كلمات ذرب الفعايل

الأرض وعره وفي البوادي مسيله
يعرف مساره من يحوز البدائل
الذيب تسمع في المرابي عويله
وحنا سرينا والكواكب دلائل
شبيت ناري من الحطب والفتيله
والليل قمري والهواجس أصائل
وبريق شاهي متزن زنجبيله
مصبوب كنه فيه عسل النحائل
النود ذعذع والنسائم عليله
يطيب فاله من براسه مسائل

يرمي همومه من له الهم شائل
إن شفت غيمن فاض لك سلسبيله
نوخ ركابك وسط ذيك المخائل
ولاتفكر في الدروب الطويله
دام الحموله فوق متن الرحائل
أطلق حجاجك وأطرد المستحيله
مادام حولك رجل ذرب الفعائل
خاوي الصدور الراهيات الشكيله
تصبح وتمسي فوق روس الصمائل
منهو شروعه طيباتن أصيله
تنشد به العربان صائل وجائل
للشامخ النشمي زهمت الحليله
وترادفت عندي المعاني الجزائل

في مدحكم نلقى كثير الخصائل
يبشر بعزه كل من ينتخيله
والله إنه عز والمجد طائل
حنا نفاخر فيك يابن سهيله
لك صيت وافي بين جمع القبائل
من عندكم تأتي العلوم الجزيله
تاريخكم تحكيه بيض النصائل
ياسعد منهو في المواقف دخيله
عمري وحكلي من خيار السلائل
مطنوخ راسه رجل يسوى قبيله
وتشوش من فعله رجال الحمائل
تكبر عزومه في الأمور الثقيله
وتصغر بعينه مسببات الهوائل
حرا ينومس كل من ينتميله
والكايده تغدي معاهم سهائل
للواجبه يبسط كفوف الفضيله
تعرف يمينه معطيات الجمائل
المال في يده مجرد وسيله
ماهو من اللي يودعون الحصائل
محشوم طبعه مايداني الفشيله
تلقاه دوما في الصفوف الأوائل
الشهم بن نورات ما مال ميله
وحنا على طاريه جبنا المثائل