كلمات المزنه العقربيه

كل هاجس يجي من غير موعد زياره
في مدار الفكر يأخذ مسار أفضليّة
ما يجنّب خلايا المخ لين انتشاره
ياصل اقصى مواقعها خليّة خليّة

يشعل الحرب في راسي من اول شراره
حرب تخفى عن العالم وهي عالميّة
الهواجيس مثل الوقت تحتاج اداره
مستحيل اني اتركها تسيطر عليّه

لو تعالج هموم الناس تاره و تاره
محد غيري تجيه آثارها الجانبية
ما يهوّن عليّ و لا يسوق البشاره
غير لا حلّت و هلّت سحابة حميّة

موعد اليوم يا سلطان طال انتظاره
والعقارب تحرّى المزنه العقربيّة
وان بغيت الكلام بزبدته و اختصاره
اسمع العلم يا سلطان بعد التحيّة

يوم دوّرت عن بيت الشرف والاماره
ما تعدّيتكم يا عزوة الهاشميّة
الذهب من مناقبكم يحدِّد عياره
قبل لا يظهر اسم الثروة المعدنيّة

اسم عمّي حسن له هيبته و اعتباره
رقمه الصعب مثل اول رقم فالهويّة
ترتفع باسمه الابيات فـ اعلى مناره
و كل الآذان تعطي للأذان اولويّة

تنجذب له بيوت المدح من غير اشاره
لو سبق علّم نيوتن عن الجاذبيّة
طول عمره وهو للـطيب مثل السفاره
و كل واحد من عياله على قنصليّة

أكرم من السحاب اللي يهل بـ غزاره
مدّته خيرها دايم ماهي موسميّة
الكرم بين سكّينه و محروق ناره
المواجيب مركيها على نار حيّة

و الهواشم ماحد يرضى بغير الصداره
كلهم روس فـ الاسلام و الجاهليّة
يمشي المجد متغطرس و فاتح زراره
لا ذكر فعلنا ينسى فعول البقيّة

الشجاعة لو يخصّص لها أسهم تجاره
نشري بكل راس المال سهم المنيّة
نشبع الموت بالاخصام في كل غاره
ما نقدّم له إلا اخصامنا النخبويّة

الكرم عندنا شيٍ ما فيه استخاره
لو ما نجهل كتاب الله و سنّة نبيّة
اشقر الكيف لولانا ما تم اشتهاره
يوم سمِّي على اسم الشاذلي شاذليّة