العين غير وجوّها غير خصوصي في وقت المسيّان يهيّضك صوت العصافير والورد لي يانع ورويان وإن هبّت النسمات اعصير تاخذ عطر من كل بستان لو في الطريق تمّر وتسير ييك ريح الورد ذنّان جوٍ خيالي فيه تغيير يعالج همومك والأحزان بتشوف بصمة زايد الخير لي واضحة في كل ميدان حصون وأفلاج ونوافير من مجد والتاريخ عنوان حازت على حشمة وتقدير وبين المدن صارت لها شان في مدحها تزهى التعابير وأنا بها مغرم وهيمان درّة لها ع الفكر تأثير تأسر قلوب وتسحر أعيان