كلمات وطن روحي

امي حكايه فارقه عن زمنها
وجه بطيب الفال والنور مرسوم

امي قصيده حب يبقى لحنها
خالد ومتجدد ولا ينتهي دوم

امي وطن روحي وروحي وطنها
ليت العمر ما بين الاحباب مقسوم

والله ما اذخر يوم في العمر عنها
لو كان ما باقي بعمري سوى يوم

( موزه ) كان الطيب مخلوق منها
قلب يشل الهم عن كل مهموم

فديتها يا كم غمرني حضنها
من عقب دمعه عيني لفقد ( مكتوم )

تبذل عطاياها وتتعب بدنها
وتسعى لفعل الخير وعزومها عزوم

ترسم لي البسمه وتخفي حزنها
وتسهر عقب ما تهتني عيني النوم

اغلى هدايا الكون يرخص ثمنها
لى جيت اباهديها وهي فاقت السوم

عمري لها فدوه وقلبي سكنها
اللي تسكن قلبها كل محروم

يا ربي احفظها لروحي وصنها
من كل باس اللى لها القدر محشوم

هي شمسي اللي من مهابه حسنها
دنياي تشرق بالسنا لو هي غيوم