كلمات ع

إنت فين؟ كان المفروض تكون هنا
النهارده هكمل العشرين وأنا عندي مية سنة
كان المفروض تكون هنا، أنا سيبت لك جوابات كثير
واتصلت بيك لكن أرقامك فجأة ضاعت أو نسيت
على فكرة أنا تايه ومش سهل عليّ إني أعترف
مش هعرف أقول إني بخير عشان أنا ببساطة بتخنق
وبحس بإني أراجوز على طول بضحك قدام الناس لكني حزين
أنا، أنا رايح فين؟
أنا ما دخلتش هندسة وما جبتش بيت بدورين وبسين
وما سافرتش جزر المالديف ولا أنا مشيت على سور الصين
وما تحولتش خارق فجأة ولا لقيت مصباح وبساط
عارف، عارف البنت اللي أنا حبتها زمان، ما حبتهاش

ما طلعليش دقن السلطان طلع لي خطوط وتجاعيد زمن
وما عملتش شعري لونه أبيض بس طلع لي خصل شلتها
وصوتي أوحش في القرآن من كثر ما أنا حفظت أغاني
وعرفت بنات مالهمش عدد بس أنا نسوانجي كإجمالي
وعلى فكرة ما بشربش سجاير بس صحابي ما بطلوهاش
عارف علان مات من فترة وهو بيضرب قال لي ده هاش
فاكر كذا؟ اتوفى برضو
آخر مرة كنت بزوره قال لي إنت عبيط
خلي السرطان ده يجيب آخره، وأهو جاب آخره
أنا شخص للأسف ما بيعيطش
حتى يوم جنازة جدي اللي كانت روحي فيه فضلت بارد

بس فاكر بعدها بشهرين عيطت أسبوع حتى ليه مش فاكر
أنا شخص في الأزمات بيبان جماد ساكت مش أكثر
دكتور في المشاعر الضالة بحس بالحاجات متأخر
مش شخصية بعرف أعبر فتلاقيني باخذ جمب
بتعصب من أي شئ بزعق لحد مالوش ذنب
وبأذي نفسي وبفضل ساكت بالشهور زي المجنون
أو بكلم نفسي في التليفون بشكي لي من وجع القولون
وأقول لي أنا جمبك متخفش والله كله ده هيعدي
والله كل ده هيعدي، والله كل ده هيعدي
حقك عليّ يا عم متعيطش عشان خاطري
لفيت دراعي مسك ظهري وكأن شخص بيحضني
ثبت فيّ وصدقت إني حد غريب بجد
فصعبت عليّ من غلبي أنا شخص وحيد بملك ولا حد

سيبك مني وطمني عليك إنت كويس والدنيا تمام
قالوا لي إن إنت تعبت من فترة والدنيا تلاهي فنستني
لا أنا بكذب أنا خفت إن إنت تزعل لما تشوف وشي
أنا كنت متعصب منك بس أنا دي الوقتِ هديت والله
ولو ممكن لو حابب يعني تكلمني كلمني أنا مستني وقاعد
أنا مش وحش والله على فكرة ساعات بصلي
وبقول الأذكار في ميعادها ومبقتش بحب إن أنا أغني

على فكرة، فلانة اتخطبت دي الوقتِ
قالت لي صراحة إن أنا فاشل ومافيش خالص رجاء مني
وقالت لي إنها كرهتني وإني بقيت ذكرى بتنساها
آه وبقت تقرف مني وإني منفعش أعمل أسرة
علشان فاهم تعبي النفسي وقالت همشي
مشيت ومابصتش وراها
وحقيقي أنا عايش دي الوقتِ بالوقت اللي أنا عشته معاها
وعموما ده نصيب مش هكفر
أنا مبسوط علشان هي قالت لي إنها مبسوطة
هو الراجل مننا هيعوز إيه من الدنيا
غير إنه يشوف الست اللي حاببها عايشة ومبسوطة
أنا بس عايز أقول لها إن أنا حبيتها
وإني ما قصدتش أئذيها ومع ذلك أنا برضو أذيتها
ربنا يهديكي ويسامحك وتلاقي أحسن مني بكثير
أشوف وشك بخير

شوفت خذنا الكلام وحكيت لك برضو عن نفسي
اعذرني ما تكلمناش من ياما فواحشني مش أكثر يعني
إنت فاهمني؟ عارف إحساس إنك تبقى إنسان غير مرئي
ظرف وعرضي أو شاشة إعلان دي الوقتِ هتديرها وتكمل عادي
أنا عمري ما كملت أغنية بزهق بسرعة من الحاجات
من كثر ما أنا حبيت بنات قلبي منحس
كل الحاجات تغلى إلا أنا ببخس
ببهت وأبان بلمع بتعب وأقول سهلة
أوسخ شعور لما قلبك بيستغنى
أو لما تتبقى البلاطة في الدومنة

ضيعنا وقت كثير وحاربنا وتعبنا وطلعنا في الآخر
بمكسب خسارتتا هل كان هذا الأمر مستحق للعناء؟
هل نحن فعلا أبرياء؟
من شخص عاش بطولة الروايات لشخص حقق
أنا كنت غبي تصدق
زعلان عشان عمري اللي ضاع مش عارف ضاع في إيه
أنا بكبر بمعدل مرعب في الثانية بزيد سنة أو سنتين
ودموعي اللي ما نزلتش بتتخزن في سواد متشال تحت عينيّ
وكل الأوقات اللي سكت وماتحركتش فيها طلعت لي في رعشة في إيديّ
وكل البشر بتروح، كل الحنين كذاب
كل اللي ساب دي الوقتِ كان قال لي هبقى معك

وأنا شخص مش بنسى الوعود لكني بنسى البشر
بنسى الأرقام والتواريخ بس ما بنساش تفاصيل ضرر
بميل للوحدة أريح لي قرف قرب البشر فواح
هتفرق إيه مسافتنا طالما حزين ومش مرتاح
ما تستغربش، أنا سني صغير بس أنا كهل
طابور الدنيا عداني عشان وحدي ومن غير أهل
أنا آسف، خلاص ما تزعلش أنا مش قصدي
بس إنت ما كنتش هنا جنبي
وقت ما الدنيا طحنتني كنت بتتفرج وبتضحك
فعذرني أنا كبرت لوحدي
باردون، على فكرة الدنيا مش أفلام كارتون
لما البطل جاع في الحقيقة السحر مأنقذوش
والناس طلعت فشوش والدنيا مش حلوة

غني لي، غني لي كم غنوة
على فكرة العالم طلع أوحش من اللي إنت ورتهولي
علمتني الخير وعلمتني الشر ما قولتليش إن البشر في النص
في مدمنين جدعان وشيوخ لابسها شيطان
وفي ناس قالت قرآن ولكنهم كفرة، كل البشر قذرة
أنا مش ملحد أنا مؤمن جدا على فكرة
بس أنا مش نبي ولا حتى ملاك أنا ببساطة بغلط لسه
جوايا سواد ياما مش هنكر وساعات بتوسخ ببقى شيطان
بس أنا مش ده ولا ده، ولا ده أنا ببساطة اِسمي إنسان
جدي نزلنا الأرض زمان علشان غلطة
وأنا ضيعت حياتي وأحلامي دي الوقتِ عشان غلطة
وأنا يمكن عيشتي كمان غلطة
من واحد واثنين وثلاثة الإنسان لحم ودم وغلطة

ليه مش قادر تتقبل غلطي؟
ليه كلنا عايزين كلنا كاملين؟
واحد خارج من خمارة خبط قسيس ع العربية
فصوتت عاهرة نبه ودان الشيخ فأنقذهم
إحنا اللي قطر الحظ تجاهلهم
سيبك من كل اللي اتقال، أنا فل تمام
صحتي مية فل وعشرة وكله هيعدي قدام
إبقى اسأل لو ينفع يعني ما تكسرش بخطري
مش عايز أحس إني لوحدي، مش عايز أحس إني لوحدي
على فكرة أنا مشهور دي الوقتِ بحكي مشاعر الناس في أغاني
وألاف سامعاني وعارفاني وبيفرحوا لما بيسمعوا صوتي

والناس بتوقفني ساعات علشان نتصور
أنا عارف إن ده مش حلمك بس أنا مش هعرف أبطل
هبقى في يوم شخص كويس تتشرف بيه وعد
صدقني أنا هنجح بس أنا محتاج منك حبة وقت
هسهر وهعافر وهحاول هعمل مزيكا تهديني
أنا مش فاشل لأ صدقني المرة دي نجحت قدام عيني
طولت عليك، أنا آسف على ضيعة وقتك
اتفضل ممكن تتفضل اوعدني تاخذ بالك على نفسك
لا ما تقلقش عليّ أنا هبقى تمام ههدى دي الوقتِ لما هنام
كل سنة وأنا طيب، سلام