كلمات مها
مها يافرحة اغلى يوم عشت أجمل تفاصيله
مشاعر كل يوم اعيد واسترجع ثوانيها
وعاد اليوم لي نفس الشعور. وعادت الليله
بشاير ليلة قدومك رجع لي كل مافيها
وله مدري فرح مدري شعورٍ صعب تأويله
اظن دروبنا الاولى تعيد اجمل خطاويها
مها يانبض قلب أبوك وأغلى من يناديله
يااجمل بنت في الدنيا عسى الله لي يخليها
يااطهر روح وأغلى أسم بين ضلوعي اشيله
مها يااحلى ثلاث حروف افاخر عند طاريها
ياحسنٍ يضوي بلطفه وقمراه وقناديله
وقلبٍ طيبته تعطي الحياه اجمل معانيها
تقدّم لك من يصونك بذكر الله وتهليله
وانا استودعت له روحي واعرف انه يداريها
هلا ياتركي اللي ماسواه احدٍ سبق جيله
زهى طيبك وتزهابك مها والحسن زاهيها
عسى منهو حباكم من كرم جوده و تفضيله
قبول وطيبة قلوبٍ جمع مابينكم فيها
يديم لكم من العز اوفره واسعد مقابيله
ومن الدنيا سرور ايامها وبهجة لياليها