كلمات حلمي التأيه

أنا ما أبيح خفاي إلا معاناتي
اللي من أسبابها خانتني العبرة
أخفي جروح بصدري ريحها عاتي
ويكشفني المنجرح واللي معه خبرة
من يجبر كسوري ومن يجمع شتاتي
ومن يفهم شعور قلب مل من صبره
أسعى ورا حلمي التايه ورغباتي
لو إن عزمي ضعف من قلة الدبرة
أثر المحبة سبب حزني ولوعاتي
وسبايب الضيقة اللي هلتّ العبرة
يا غايتي معك أقضي لذة أوقاتي
وبغيابك أيام عمري شينة وغبرة

صدك حرمني فرح عمري ولذاتي
وأعطاني دروس وأعطاني بعد عبرة
من بعد هجرك ما أعرف إلا تنهاتي
وخواطر كسرت ما هي بمنجبرة
طيوفك تمرني وتشد نظراتي
وتاخذ خيالي بعد هجرك وتختبره
من محجر العين طاحت كل دمعاتي
دموع عيني بعد فرقاك منزبرة
ترفقي بي وجوّدي في ملاقاتي
وبكفن الحزن وأواريه في قبره
لعل في شوفتك تشفع لي أبياتي
ترا القلم يا حياتي جف من حبره
صوتك ينسيني همومي وعثراتي
لو إن من شفتك ما أسمع سوا النبرة
والله لو أقطع مع العالم علاقاتي
أهم حاجة وصالك ما انقطع شبره