كلمات الصدر الرحيب

سريت يوم ان ضاقت الديرة على الصدر الرحيب
لو ماسريت الا بلاي هلالها الي ترقبه
طرّا علي وجيه اهلها عقب خلوني صويب
مال المعايد روح يوم الدار غاب معزبه

مير اقبلي ياحلام عمري وارقبي مثل الرقيب
واخلْي سبيل الذكريات الي علي متكركبه
من شاف لحضات الغروب عصير قدام المغيب
يبا يشوف الماضي بحلوه ومره وعربه

وانا احسب الي راح راح اثره من الخاطر قريب
يمرني كل مادلهت الين اغنّي بسببه
لو كان قلبي من صواديف الليالي قلب ذيب
احيان تومي به هبايب نجد لو هي تطربه

ياليت كل ايامنا عيد ولياليها تطيب
وليا بغينا نفعل المعروف بس روح وجبه
ان زان لك وجه الزمان يعرفك بـ امية صحيب
وان شان وجهه يمكن الواحد ماتقدر تقضبه

وف الحالتين انا مرحبّه يجيب الي يجيب
معطيني الوالي على حسن التصرف موهبه
غير القصيد الي ماينقده الاديب ابن الاديب
احرص على حبكه وسبكه كل ماجيت اكتبه

ياصحابي الشعار فالابداع كلن له نصيب
دارين لكن جاكم الي حطه ف سد شنبه
الشعر ديوان العرب من شذ به ماهو عريب
بالله عليكم ياجماعة خير لحد يشذ به

ودك مايسند غير للي فيه ظنك مايخيب
يوقّف الدنيا وظنك مستحيييل: يخيّبه
زحلً مثل بندر ولد مقبل رع الراي الصليب
لاعمست الارياء يسنعها وهو في مكتبه

رمزً من مطير العظيمه لادنا الامر العصيب
فنجال بقعا دون حمران النواظر يشربه
اليا تزعم قالةً غلق طليبً من طليب
واليا تقدّم مايعوّد غير بعتاق رقبه

سوو سواته كانكم تحرون بالمجد المهيب
المجد ماكل من بغى يقدر يعدّي مرقبه
من يحتزم به والله ليضرب على همه صليب
ويحط كل باقي ظروف الوقت تحت التجربه

امدح واماريبه ليا مارى الغريب امع الغريب
انا إحمياي ف بني عمي على اعلى مرتبه
ترا القصيد الي نعرف ان طال كل ماله يشيب
لكن بندر مدحه ان طال القصيد يشببه

بالسمعه الي من صداها مع غيابه ماتغيب
ومن كثر ماحِطّ النعم فوق اسمه الي طيّبه
عزالله انك يبو بارع ماليً دنياك طيب
من وين ماوجهت لك طاري ومجدً نحسبه

لاعد كلً مكسبه سلم على الفذ اللبيب
الي يشوف ان معرفة شرواك دايم مكسبه
وحنا نعدك ركن للابه ومنصاها النجيب
مطير تفخربك وتدري مال وقفاتك شبه

مهما يسوي ماعليه اليابسي شيً غريب
ماهي غريبه عادته يالعالم المتعجبه
الاد يابس هم هل الطاله منزحة الحريب
ولا عليهم زود لو كلن يزايد بنسبه