كلمات حمودي

كل عام و انت بخير و أيامك بخير
ياكبر قدّرك حتى لو سنك اصغير
حمودي احترنا وش اللي نقدّم
لان ميلادك به أفراحنا غير

عمّ الفرح في جيّتك كل هالدار
و قمنا نبشر بعضنا صغار وكبار
على كثر ما فيك حسن و براءه
نقرى عليك من الحسد ورد الأذكار

أول سنة من عمرك اليوم مرّت
و من يوم جيت اعيوننا فيك قرّت
جيت بفرحنا اللي كثير أنتظرناه
مثل الليالي اللي  لمجيّك تحرّت

أضحك يا عين أمك و يا فرحة أبوك
و نقول للدنيا بجيّتك  مبروك
عزّك خذيته من هلك  لين ما ذاع
صيتك مثل منهم على العز ربوك

أبوك عبدالله ليا أطروه شفنا
هيبة وعز السيرة اللي عرفنا
عبدالله ابن خالد العز و الجود
القول ما يلحق مداه ان وصفنا

و عبير يوم الله وهبها و جابتك
ماهو غريب ان كان للمجد ربتك
الله يبلغها بك اتشوف برّك
و تشوف مرجلتك و فعلك و هيبتك

يا محمد اللي مسكنك بالحنايا
ياللي رزقنا  فيك جزل العطايا
كل من يجي يمّك يبارك و يهدي
يتأكد إنك  إنت أغلى الهدايا

يارب هذا اليوم كل عام ينعاد
لا انعاد تاريخه بنا والله اراد
ياللي مسمّى بسم جدّك محمد
يالله عساها دايم أعوامك أعياد