كلمات مقناصنا

ما دام في مقناصنا راحه البال
نفوسنا في ما بغينا عجوله
ما باقي الا هدت الطير في الحال
الي يبشر بالعشا لا دعوله

وطيري لا شاف الخرب ما يكفح الفال
حتى يحولها للارض بسهوله
له في صدر راعيه مركى ومنزال
لا قرب لغيره ولا قربوله

الا الهنوف الي لها قدر واجلال
الي غلاها في ضميري قبوله
فيها وصوف الطير في بعض الاشكال
وفيها اختلاف بوقفته وبمثوله

الطير عجل ولا يجي حوله جفال
والبنت فيها ثقل لكن جفوله
والطير فيه عيون مجرم وقتال
والبنت فيها عيون دعج وكسوله

والطير ما يخجل لا فرع الرجال
والبنت لا من فرعوها خجوله
لا شفت طيري قلت يا حي الازوال
الي غلاهم حال وانحال حوله

حتى ولو من بيننا اميال واميال
شوقي لهم دايم تدرهم ذلوله
لهم بقلبي شي باقي ولا زال
ماباقي الا اصيح من كثر هوله

متى على الله نجمع الشمل ب وصال
واقطف زهرهم قبل حزه ذبوله
يرتاح لا من شافني سمح القبال
وارتاح لا من شفت شكله وزوله

ولا انا والطير ما نبغي جدال
الى بغينا الشي لازم نطوله
لا صار مال الرجل مخرج ومدخال
ما كل مايبغى ينوله ينوله طيري