كلمات سماها غير هالاحساء
ابكتب من حروف الحب قصيده عشق منثوره
في ديره تسكن بدمي وتسحرني لياليها
ذكرها عطر الدنيا وضوى ف السما نوره
عريقه بكل ماتعني العراقه في معانيها
رسول الله ذاكرها و ف الاخبار مذكوره
ياعبدالقيس ياقوم تعرف المرجله فيها
سماها غير هالاحساء بها الارواح مجبوره
وحنا صغار ف الرمله تغنينا ب اغانيها
ف اراضيها تربينا وعشنا ايام محفوره
نموت ومانسيناها ولاننسى طواريها
تسامرنا مع الماضي شربنا العشق قاروره
ولين الحين مانروى ولو طالت مبانيها
في طيبه اهلها ميزه عليهم بس محصوره
تواضعهم سبب يكفي من الاخلاق عاليها
مناره علم هالاحساء وللطلاب مشهوره
مذاهب خمسه تحوي ابسال من يجاريها
في غربتنا تعذبنا وكلن فاقد شعوره
نفكر دوم بالرجعه تعلقنا ب اراضيها