كلمات سرقت فرحة

سرقت فرحة حلمت بيها طول سنيني
علَّقتي قلبي بيكِي وانتي بتبعديني
وغِبتي عني وانتي عارفة هتوحشيني
أنا قلت بعدك عني حاجة من الخيال
دلوقتي حالتي عايزة وصف الف شاعر
حتى الكلام ما بقاش يريح المشاعر
الكل ناسي بس قلبي لسه فاكر
وآهو كل يوم يسألني ليه  .. نفس السؤال؟

**

مش كل حاجة حلمنا بيها بنلاقيها
فيه حاجات كتير بنكون خلاص هنموت عليها
ييجي القدر، تيجي الحياة تقتلنا بيها
سمِّيها لعنة الفراق أو كبرياء
أوقات كتير بنكون ما نقصدش في سلامنا
إن الوداع هيكون خلاص آخر كلامنا
بس الحقيقة دخلنا حرب وانهزمنا
كل اللي باقي من الحكاية الاشتياق

**

أنا آسف إني حاولت يوم وفضلت أعاند
كان لازم أمشي من زمان.. ما هو كله واحد
كان لازم أمشي من زمان وأنا قلبي بارد
دلوقتي قلبي قال لي بس فين دواك؟
لو كنت عارف النهاية من البداية
لو كنت حاسس إن حبي مش كفاية
يمكن ساعتها جرحي كان يفرق معايا
وكان هيبقى هادي.. مش بركان هلاك

**

زعلت ليه لما اعترفت بالحقيقة؟
عايزاك تفكر بس في الموضوع دقيقة
كان نفسي أعيش جنبك في أحلامنا البريئة
بس القدر قال كلمته.. وخلص الكلام
دلوقت عايشة أهو بجمع ذكرياتي
ودَّعت أحلى فترة عشتها في حياتي
سبتك وماشية.. بكرة تفهم من سكاتي
إنه ما كانش جرح ليك.. ولا انتقام