كلمات ضنا هبس

خروج عن المألوف و الدارج المعتاد
الابداع الى منا حضرنا عمر صفه
بـ سحر البيان اللي يكحل عيون الضاد
الالباب مسلوبه و الارقاب ملتفه
توسط من العيدين يا ثالث الاعياد
من الضفه يرحب مضيفك الى الضفه
هنا لـ الفخر سيره هنا لـ الحمايا ماد
هنا لـ المدايح فعل ترجح به الكفه

نزف الثنا له قبل لـ المحفل نزفه
ابن دايل نعده لا شان الزمان اعتاد
عليه الهقاوي لابدا الشان مصطفه
عن اللي داوديهم على دله و براد
سمت سمعته عن هرجة ضعوف ومسفه
توطا كبود عداه وطيه على السجاد
عطاهم دروس بـ عزة النفس و العفه
فرق بـ المواقف في عيون الرجال وزاد
يوم ان غيره ان وقـف يوقـف على طفه
ولد محسن النايل ما يحتاج له شهاد
تطوف ونعم في ذايع الصيت وتحفه

لاثقل الحمل يقدر عليه وعلى استعداد
يخليه يا خفه لا وقـف على خفه
الى حزت ولزت وجا فـ الامور عناد
وصار اكثر العالم من العلم منكفه
وقـف من يقول العز ما جابه المقعاد
و صافح يمين العز و الطاله بـ كفه
من ربوعي اللي ذكرهم لـ العماس قناد
على صيتهم بالك ليا ضاق بك صفـه
خوالد لنا في كل مجلس فخر مقعاد
بـ صدره قلطنا ما قلطنا على الحفه
على اصحابنا بلسم مداوي و طب أكباد
مثل ما زعـلنا يردع الضد عن شفه
يسولف بنا التاريخ لـ الفعل والامجاد
مع ان مجدنا و فعولنا ماليه رفه
خوالد من الحد العماني ليا بغداد
هل العزوه اللي تثلم الجمع و تدفه
اهل حاضر خالد و اهل ماضي ينعاد
و اهل بيتن مشيد تخالف به ضيـفه
ظهور الجياد اليا عتلينا عليها جياد
ثقال وعلى صوت العزاوي بنا خفه
ضنا هبس لامن صار فيها غضب وعناد
بنا تفرح اللي تذرف الدمع و نكفه
تطير الحبارا في ذرانا ولا تنصاد
تحت هيبة الرمح المزرج وفي ضفه
ما والله نلد العين في شيخ ولا شداد
مدام ان لـ البرثن على الطايله رفـه
لو انـا ما وسـدنا المعادي نكد و كداد
ماجات العرب من سبع الاحلاف ملتفه
لا دققت فـ الصوره ثلاثية الأبعاد
يعيش الفخر في ظل الأفعال مترفه
بعدنا لا تذكر مجد ولا تعد اسياد
نبانا لقت فيه التواريخ متنفه