كلمات الكتاب

كتاب و عنوانه مجروح..كل اللى شايفه قسي و دموع و باب مفتوح
كاتب في أول صفحة البداية..راسم ولد كله طموح
في تاني صفحة كاتب كفاح..في صفحة تاني شايف خضوع
و في صفحة نقطة دم..و في غيرها شايل هم أيام ما كنت مخدوع !!

و تفوت صفح كتيرة فاضية ميملهاش حكاوي الكون
لما بغمض و احاول اكتب..بلقي الحياه في عيني تهون !

و في صفحة تاني مكتوب وطن..مرسومة جنبه وشوش كتير
اللى بدقن..و اللى من غير...و الضحكة واحدة بدون تغيير
شكله جديد..شايله شهيد..مين اللي قال يا خلق هو
أن الامان أجله بعيد !!

و تفوت صفح كتيرة فاضية ميملهاش حكاوي الكون
لما بغمض و احاول اكتب..بلقي الحياه في عيني تهون !

و في صفحة تاني مرسوم طريق ضلمة و طويل مفيهوش صديق
و عالجنبين مفيش ورود..مالوش حدود..و في أخره نار دمار حريق
و في قلبه ياما ناس كتير...راحو و ماجوش..ماليان وشوش..مفيهاش برئ
و السكة صعبة و القلب شايل هموم كتير..صعب المصير..بحر و غريق

و تفوت صفح كتيرة فاضية ميملهاش حكاوي الكون
لما بغمض و أحاول اكتب..بلقي الحياه في عيني تهون !

و في صفحة تانية مرسوم فيها 4 خناجر في ضهر واحد
ماشي يدور علي حد يرضي يشيله منهم لو بس واحد
لكل واحد منهم سبب اسباب كتير و الغدر واحد
و الغريبة..ماشي بيضحك و يندم ليه و الرب واحد

و تفوت صفح كتيرة فاضية ميملهاش حكاوي الكون
لما بغمض و احاول اكتب..بلقي الحياه في عيني تهون !

و صفحة ورا صفحة..كتير ميتعدوش
مرسومة ناس...ناسيهم...مرسوم وشوش
و ناس كتيرة غيرهم...راحو و مرجعوش
و ناس تقولك هات...ياخدو و ميدوش
و ناس ليهم قصص..و ناس ليهم حكاوي
و ناس هدومهم...دهب...لكن ميسووش

و تفوت صفح كتيرة فاضية ميملهاش حكاوي الكون
لما بغمض و احاول اكتب..بلقي الحياه في عيني تهون !