كلمات هتقولك

هتقولك فاهمة وحاسة
هتقولك عايزاك لسه
هتقولك خليك جنبي
أنا خايفة تسيبني وتنسى

هتطبطب وتقول آسفة
وتحس في عينها اللهفة
هتقولك دانت في قلبي
وتخش معاك فـ مجازفة

هتطير م الفرحة سيادتك
فهتجري وتكشف ورقك
وتبعبع باللي في قلبك
فتشوف فـ عيونك ضعفك

ضحكتها تنسيك اسمك
لمستها تقشعر جسمك
دقات القلب تقولك
دي أحن عليك من أمك

واكمنك عيل خايب
وسرحت في صوتها ودايب
بقى عقلك فاكك سايب
وبينكر كل حقيقة

بتجرجر رجلك يااهبل
بتسوقك وبتستهبل
وعشان بتحب هتقبل
ترضيها بأي طريقة

هتشوف نفسك غلطان
مع إن غلطها راكبها!
وتعيش دايما ندمان
مستغرب ليه بتسيبها

هتأنب ياما ضمير
والذكرى هتيجي كتير
وهتتعب م التفكير
ال يعني يا عيني ظالمها

فوّق وبلاش تتغفل
استرجل ياابني وكمّل
اتعلم مالى بيحصل
دي الواحدة فـ يوم تتبدّل

وتقولك فاهمة وحاسة
هتقولك عايزاك لسه
هتقولك خليك جنبي
أنا خايفة تسيبني وتنسى