كلمات أحلى بشر

يالي جمالك عجب .. لا طلة اهدابك
تراك من طلتك في الناس متجمّل

يـ احلى من احلى بشر شرّف على احبابك
عاد الغلا فيك متعشمّ و متأمّل

في جيتك يستحي من نفسه غيابك
يوقف لك الشوق لين اطرافه تنمّل

الفرصه الي تحبك كيف تحظى بك
و الموعد الي يجيبك كيف يتحمّل

سولف لو الوقت ما يرضيك يرضى بك
السالفه معْك ما تكمَل و لا تنمّل

لا تسكت الله يرحم شايبٍ جابك
بتخلص السالفه بـ اقول لك كمّل

يزهى بك الورد يالمملوح يزهى بك
الورد في غيبتك ذبلان و مهمّل

يشمّك العطر و يقرّب من ثيابك
و المعطف اللي يضمّك فيك متزمّل

تحوفك الأرض حشمه و تحفّى بك
و يمرك الغيم لا وقّف و لا كمّل

كنه الى مر من فوقك توصى بك
ظنّي المطر ينتظر جيتك و يهمّل

يعزف لك العود و الناي يتغنى بك
يثمل بك الخمر كيف الخمر ما يثمل

مُعجب بك الكون محدٍ ناله اعجابك
شفت القمر فيك متعجّب و متأمّل

ما يختلف فيك عذالك مع اصحابك
بعدك و لا احدٍ يقول الزين ما يكمل

تقدر ترد الغلا و تريح اعصابك
بس الغلا فيك متعشمّ و متأمّل