كلمات اشوف مرايتي

احس مرايتي تنقد على شايب اشوفه شاب
تشوف مرايتي شيبي واشوفه طفل في عيني

اجامل باقي سنيني اقول ان العمر كذاب
احسب ان المشاكل فيه واثر المشكله فيني

نعيش الوقت وتمر الليالي ما لها حساب
وفي لحظه فكر هوجست وش باقي من سنيني

قمر ذاك الشباب الي من اول للاسف قد غاب
وشمس الشيب بانت واشرقت والنور معميني

شبابي راح ما ودي وشيبي ما عنه مجناب
غدت كل السنين وكنها يا ناس يوميني

افل الروح وامضي في مكاتيبي مع الاصحاب
وانا احسب عمري الحاضر مثل ماضيه الى الحيني

وشفت مرايتي والوجه شيب والشعر قد شاب
ومن شفته وكن الشيب من نومي يصحيني

يقول ان العمر بيد الولي الواحد التواب
وب ان الموت عابر فوق سبعيني وعشريني

وبان الموت لا جا العبد ياتي له بدون اسباب
ولا ينجيه غير انه معا جمع المصليني

يعني كل هالعالم سلاطين ودول واحزاب
لهم نفس القبر محفور تجار ومساكيني

وصاتي ياعلي درب المراجل كون لها كساب
ترى طاري الرجل باقي ولو هو مات ياعيني

تقداء في ابوك وخل ياسر لك طريق وباب
تنشد عن وفى الضلعي وتلقاها عناويني