كلمات رمضان زمان

رمضان نور و روح و إيمان .. يداوي قلوبنا .. تغيب احزان
صوت دُعانا في كل مكان .. مسجد بيت مليان قرآن

قلب يدق بحب و رقة .. نفضل نحلم بالجنّات
سبحة في ايدك  .. دمعة في دعوة .. روح تتمنى كل ثبات
رمضان جانا .. حلّو يا حلّو ..  على أوتارنا يعزف نغمات
ندعي و يغفر الله ذنوبنا .. على بسم الله نصحى و نبات

رمضان مش شهر عادى .. دا حالة أمان
تعالوا سوا نفتكر رمضان زمان

صوت الشعراوي يهدّي قلوب .. حكمة وشرح للآيات
الراديو .. و محمد رفعت .. نور القرآن مع النفحات
ضعيف على أمري .. أنا مغلوب .. لكن طمعان في الرحمن
بدعي لنفسي وبدعي لغيري .. والأعمال بقا بالنيات
ياااه … يا رمضان
بوجى وطمطم و نُص ضحكة .. زيكو وشكشك فى الشباك
ليالي الحلمية حكاية بِحَبكة .. ذكريات صيفك وشتاك
الكلام اللي كان من فضة و دلوقتي أصبح دهب
و حوار صريح جدا م القلب .. حوار على هنا وهناك

فكّر ثواني وشادي و هادي
و أرابيسك دا كان حكاية روح
المال و البنون .. و ساكن قصادي
و عباس الضو اللي فوق السطوح
في ليالي رمضان …
فوازير نيللي و شريهان
و عمو فؤاد يحكي كمان
أنت عامل ايه .. مبسوط و لا ايه
كان حِلمِنا سلاحف النينچا تعزل م المكان

زينة و فوانيس و أحلى النسايم
و مسحراتي في الشارع ينادي
اصحى يا نايم واحد الدايم
و القلب صاحي قبل المُنادي
هنعيش ع الذكريات ..
واااه يا رمضان